NNH meiner at med det brukaromfanget som naturterapi og alternativ behandling har i samfunnet i dag, er det på tide at denne behandlingstradisjonen blir omtalt i framtidige folkehelsemeldingar. Naturterapi er ein del av det totale helsetilbodet, og er for fleire hundre tusen av det norske folk eit verdifullt tilskot til det som det offentlege helsevesenet kan tilby.  Mange nyttar også denne behandlingstradisjonen som førebyggjande tiltak.  Både behandling, livsstil- og kosthaldsråd er viktige tema i høve dette.

Fakta

For å illustrera litt av omfanget, er blant anna denne undersøkinga frå NAFKAM relevant: Use of complementary and alternative medicine in Norway: a cross-sectional survey with a modified Norwegian version of the International Questionnaire to Measure Use of Complementary and Alternative Medicine (I-CAM-QN)

Ei spørjeundersøking frå NAFKAM 2018, viser at 63 % meinte dei hadde fått ein betre helsetilstand ved bruk av naturterapi/alternativ behandling. Rapportering om forverring eller biverknadar var minimale.

Internasjonalt

NNH er fullverdig medlem av World Naturopathic Federation (WNF).  Dei har i desse dagar levert eit omfattande HTA-dokument som omhandlar praksis, effekt/dokumentasjon, økonomi og tryggleik innan naturterapi/naturopati. Dette 750 siders dokumentet stadfestar verdien og omfanget av denne behandlingstradisjonen verda over, og at forskingsstatusen er langt betre enn det ein kan få inntrykk gjennom media. Ein norsk versjon av samandraget er også publisert.

Forutan at WHO gjennom mange år har sett verdien av det dei nemner som tradisjonell medisin gjennom fleire rapportar, har dei nyleg også teke initiativ til etablering av eit globalt senter for tradisjonell medisin i India.   Det nye senteret fokuserer på fire strategiske hovudområde: dokumentasjon og læring; data og analysar; berekraft og rettferd; og innovasjon og teknologi for å optimalisera bidraget frå tradisjonell medisin til global helse og berekraftig utvikling.

Sosial ulikskap

NNH har i Strategisk handlingsplan formulert fylgjande visjon:

Alle innbyggere, uavhengig av geografi og økonomi, får tilgang til et trygt naturmedisinsk tilbud både innenfor helseinstitusjoner, bedriftshelsetjenester, helsefremmende institusjoner og i privat praksis.

Ved innføring av meirverdiavgift på alternativ behandling, opplever NNH at den sosiale profilen blei forsterka i negativ lei.  Med det honorarnivået som er vanleg i dag, ekskluderer dette allereie mange som ynskjer og ville hatt nytte av naturterapeutisk/alternativ medisinsk behandling.  Dette er spesielt bekymringsfullt, ettersom ein veit at dei med låg inntekt har gjennomsnittleg større helseutfordringar.