Det skal vera trygt å oppsøkja ein naturterapeut som er medlem av NNH
Styreleiar i NNH John Petter Lindeland sitt innlegg på Pasientsikkerhetskonferansen i regi av NAFKAM og SABORG i 2023
Det kan vera utfordrande å skilja ut spesielle element i vårt organisasjonsarbeid, sidan mest alt handlar om at det skal vera trygt å oppsøkja ein naturterapeut som er medlem av NNH.
Eg har likevel valt å trekkja ut seks hovudelement som eg meiner er dei mest sentrale:
- Vedtekter
- Yrkesetiske retningslinjer
- Kvalitetssikring av utdanningar
- Kontinuerleg påminningsarbeid
- Dialog med pasientorganisasjonar/andre aktuelle aktørar
- Handheving av regelverk
Yrkesetikk
I våre vedtekter har me generelle retningslinjer for både medlemmene sine plikter i høve medlemskapet, saksgang i samband med Etisk råd og sentralstyret sitt arbeid ved klagesaker. Våre yrkesetiske retningslinjer – på totalt 15 sider – inneheld detaljerte retningslinjer i høve terapeutrollen, men også inspirasjon til etiske refleksjonar, rådgjeving og som retningslinjer for saksutgreiing. Til det siste er det blant anna fokus på habilitet og kontradiksjonsprinsippet.
Sidan tida er knapp, har eg lyst til kort å nemna dei emna som har fokus under kapittelet Naturterapeuten og pasienten: Journalføring – inkludert lagring og sletting, overføring og delegering og teieplikt. Vidare om honorar, etiske grenser/upassande adferd, sårbare grupper, diagnose og kommunikasjon, sosiale medier, bioteknologi/gentest, kosthold og ernæring, hygiene, teknisk utstyr, gåver, kommersielle interesser – kjøp og salg av produkt, rusmidler og faglig oppdatering. Heilt på slutten har me også ein fagspesifikk del, som er retta mot spesielle terapiformer – i vårt tilfelle akupunktur, aromaterapi og kraniosakralterapi.
Utdanning
Kvalitetssikring av utdanningar vurderer eg kanskje som det viktigaste arbeidet i høve pasienttryggleik. I og med at NNH også er eit akkrediteringsorgan for godkjenning av studieplanar ved ulike utdanningsinstitusjonar, vil fokus på pasienttryggleik vera sentrale element i ei godkjenning. Aktuelle tema her vil vera liknande det ein har innanfor offentlege helsefagutdanningar – det ein kallar VEKS-fag – vitskap, etikk, kommunikasjon og samfunn. Dette er implementert i vårt Utdanningsdokument og i alle spesifikke retninglinjer innan ulike terapifag som me har utarbeida.
Påminningsarbeid
Mange av dei etiske grunnverdiane er kollektive prinsipp som ligg nedfelt i vår humanistiske kultur som kanskje meir eller mindre automatiske refleksjonar. Likevel meiner me at etikk og tilhøyrande tema er ferskvare som må repeterast om att og om att. Under pandemien fekk me nye digitale verktøy som me har funne nyttige i dette arbeidet. Me har etter kvart hatt mange nettseminar som nettopp har fokusert på etiske refleksjonar slik som diagnose og kommunikasjon, marknadsføring, naturterapi og kreft, naturterapi og psykisk helse, traume og livsmestring osb. Dette kjem me til å fortsetja med i åra som kjem.
Dialog
Eit døme her er eit møte me hadde med Norsk barnelegeforening og Landsgruppa av helsesjukepleiarar like etter at det i media hadde vore fokus på alternativ medisinsk behandling og barn – og der det blant anna hadde blitt brukt skjult kamera som journalistisk metode. Ein slik direkte dialog med pasientorganisasjonar/fagorganisasjonar og andre aktuelle aktørar er svært verdifullt med omsyn til å skapa medvit om praksis som kan vera omdiskutert – og skapa endring på sikt – og dermed større legitimitet i samfunnet generelt utan innstramming av regelverk. I Sverige har dei blant anna 8 års grense for behandling av barn utført at terapeutar som ikkje er helsepersonell.
- Møte om behandling av barn: Auka tendens til sjukleggjering er urovekkjande [nnh.no 14.06.2017]
Handheving
Som nemnt tidlegare har også NNH eit Etisk råd som arbeider etter dei retningslinjene som ligg nedfelt i våre vedtekter og yrkesetiske retningslinjer. Det er sentralstyret som har mandat til å gjera vedtak om eventuelle sanksjonar mot medlemmer – og landsmøtet som vurderer anke i slike saker. Eit viktig prinsipp er også at me alle skal læra noko av både klagesaker og eventuelle skader. Difor er det viktig at dette blir formidla til medlemmene i ei form som gjev læring og refleksjon. Dette vil me ha større fokus på framover.
