NNH har gjennom mange år vore medlem av Nordisk samarbeidskomité for komplementær og alternativ medisin (NSK). Dette er eit forum der organisasjonar frå dei nordiske landa møtes for å utveksla informasjon om kva som skjer av både fagleg og politisk karakter. Kvart land leverer landsrapport ei god tid før møtet. Desse blir gjennomgått, og drøfta i plenum.
Det er ein pågåande debatt i Danmark om legitimiteten til registeret for alternative behandlarar (RAB). Lægeforeningen i Danmark har vore førande i kritikken, og som i etterkant er fylgt opp av helseminister Magnus Heunicke. Han har annonsert at det etter covid-pandemien vil bli ein gjennomgang i høve denne ordninga. Fokuset er pasienttryggleik og forbrukarrettar. Responsen frå registrerte RAB-terapeutar, er at kritikken er fragmentert og ikkje byggjer på god dokumentasjon. Debatten liknar i så tilfelle på den norske, som også ber preg av anekdotiske forteljingar.
